Čvrsti i lijepi nokti ideal su mnogih žena, a većina nažalost poseže za geliranim noktima ili trajnim lakom jer se nemaju vremena brinuti o svojim. U nastavku otkrivamo kako ojačati nokte, odnosno donosimo vam vodič za jačanje i njegu noktiju kako biste spriječili listanje, pucanje i neugledan izgled suvih noktiju. Keratin je protein koji gradi nokte, kosu i kožu te obezbjeđuje njihovu čvrstoću. Osim spoljnih tretmana i zaštite noktiju, potrebno je zdravo se hraniti kako bismo izgradili lijepe i zdrave nokte. Neke od namirnica koje odlično djeluju na zdravlje noktiju, kože i kose su riba, alga spirulina, bademi, sjemenke (konoplje, bundeve, chia i suncokreta), jaja, jogurt, zeleno lisnato povrće, batat, zobene pahuljice i orasi. Iako su nokti sami po sebi čvrsti i otporni, potrebno ih je čuvati od spoljnih uticaja koji ih isušuju ili uzrokuju oštećenja. Time rečeno, ako želite jake i lijepe nokte, ne otvarajte njima poklopce konzervi, alkice ključeva i slične stvari. Takođe, investirajte u dobru kremu za njegu kože ruku i noktiju, posebno tokom hladnih mjeseci.

U nastavku saznajte kako ojačati nokte da ne pucaju.

Kako ojačati nokte?

Slijedite ovih 10 koraka za čvrste i zdrave nokte:

1. Smanjite izloženost vodi – tokom pranja suđa koristite rukavice, a tokom kupke u kadi držite ruke van vode.

2. Držite nokte kratkima – ako imate problema s noktima koji se listaju ili pucaju, ne pokušavajte ih puštati da budu dugi jer će tako samo lakše pucati.

3. Pijte mnogo vode – pravilna hidratacija čitavog organizma ključ je zdrave kože, kose i noktiju.

4. Njegujte nokte uljem – kako biste spriječili listanje i suve nokte, njegujte ih hladno prešanim uljem ili posebnim uljima s aplikatorom koje možete kupiti u raznim drogerijama.

5. Uložite u kremu za kutikule – suvi nokti i kutikule uzrokuju zanoktice te oštećenje tkiva koje može unazaditi zdravlje noktiju.

6. Izbjegavajte lakiranje noktiju – često lakiranje noktiju uveliko oštećuje nokte jer su komercijalni lakovi prepuni štetnih hemikalija.

7. Koristite lak za jačanje i njegu – ako već ne možete bez laka za nokte, koristite lakove za jačanje, po mogućnosti prirodnog sastava.

8. Pripazite kod čišćenja – kao i kod pranja suđa, koristite rukavice da zaštitite nokte od nagrizajućih sredstava za čišćenje.

9. Nosite rukavice tokom spavanja – nakon nanošenja kreme i ulja na nokte, stavite rukavice i spavajte s njima. One će pomoći koži i noktima da bolje zadrže vlagu i upiju proizvode za njegu pa će pojačati djelovanje.

10. Koristite uljni odstranjivač laka za nokte – uljni odstranjivači manje će isušiti nokte nego oni na bazi acetona.

Zadnjih nekoliko godina ponovno su popularni lijepo oblikovani kratki nokti pa vam ne mora biti žao što svoje ne možete puštati. Uvijek je bolje dovesti nokte u red kako bi što manje pucali kada narastu.

Ako vodite borbu s noktima koji se listaju, odbacite turpiju i režite nokte makazicama ili grickalicom. Turpijanje noktiju rastvara slojeve nokta koji se onda još lakše odvajaju i pucaju, prenosi krenizdravo.dnevnik.hr.