Košarkašice Budućnosti lako su izašle na kraj sa Trešnjevkom na svom terenu 81:56 (16:11, 28:12, 20:13, 17:20), u trećem kolu regionalne WABA lige.
"Plave" su na otpor rivala naišle samo u prvoj četvrtini. Nakon uvodne dionice "vučice" su imale plus pet (16:11), da bi u nastavku u potpunosti došla do izražaja razlika u kvalitetu. Podgoričanke su nakon 30 minuta igre imale 28 poena prednosti, pa su se malo opustile u posljednjoj četvrtini, što je Trešnjevka iskoristila i malo ublažila poraz 81:56.
Budućnost je do druge pobjede predvodila Amerikanka Katerin Brigs sa 17 poena, 17 je ubacila Jovana Savković, a dvocifrena su bile još i Jelena Bulajić sa 11 i Zorana Radonjić sa 10 poena.
Kod Trešnjevke, koja je upisala prvi poraz, sa 17 poena se istakla Nina Novak.
