SC Derbi debituje na Superkupu ABA lige, nakon istorijske prošle sezone u kojoj su “studenti” osmim mjestom prvi put izborili plej-of, u tek drugoj sezoni u elitnom regionalnom takmičenju.

Uz to, tim Andreja Žakelja je itekako namučio Partizan u četvrtfinalu plej-ofa, i primorao ga na majstoricu u Beogradu.

SC Derbi će u četvrtfinalu, u ponedjeljak od 21 čas, igrati protiv FMP-a.

- U svaku utakmicu, na svakom takmičenju, ulazimo motivisani, sa željom da stignemo što dalje. Profesionalci smo, radimo za pobjedu, tako će biti i na Superkupu. Još je rano, mislim da mi, kao ni ostali timovi nismo u optimalnoj formi. Ali, ovaj turnir je dobrodošao za nas, imaćemo tri jake utakmice, iako su na neki način pripremne, ali želimo da startujemo pobjedom. Što se FMP-a tiče, mislim da igra slično kao prošle sezone, sa tim trenerom igraju baš agresivnu košarku. Nismo pričali o rivali, više se bavimo našom igrom, i tako će biti i u narednim danima – rekao je trener SC Derbija Andrej Žakelj.

SC Derbi je imao promjena u rosteru ovog ljeta, nova imena su plejmejkeri Luka Bogavac i Borna Kapusta, te američko krilo Obri Dokins, dok su se iz Budućnost Volija vratili Igor Drobnjak i Kenan Kamenjaš.

Nikola Pavlićević, Mateo Drežnjak i Tomislav Ivišić predvode grupu igrača koja je ostala u timu, a koji je ostao bez Andrije Slakovića i Flečera Megija koji su otišli u Budućnost Voli.

- Nemamo neka posebna očekivanja od Superkupa. Od naše ekipe se, prvenstveno, traži da pokaže što bolju igru i energiju, a ako je moguće i da dobijemo. Nemamo imperativ da nešto moramo, već da se prikažemo u najboljem mogućem svjetlu – rekao je Mateo Drežnjak, krilni košarkaš SC Derbija.