Promjena trenera, odnosno povratak Meta Delija odmah je donio rezultat - američka teniserka Koko Gof odigrala je sjajno finale na turniru u Pekingu, preslišala Čehinju Karolinu Muhovu sa 6:1, 6:3 za 77 minuta i domogla se druge ovosezonske, i ukupno osme titule u karijeri.

Gof je nakon razočaravajućeg nastupa na Ju-Es openu u glavnom gradu Kine odigrala odličan turnir, u finalu svoj najbolji meč ove sezone i postala najmlađa šampionka Pekinga u posljednjih 14 godina.

Dvadestogodišnja Amerikanka će od sjutra biti peta igračica svijeta i na dobrom je putu da se kvalifikuje za završno VTA finale u Rijadu treću godinu zaredom.

Muhova je ostala na jednoj osvojenoj tituli, ali nakon finala u Pekingu i velikih pobjeda nad šampionkom Ju-Es opena Arinom Sabalenkom i olimpijskom pobjednicom Ćinven Dženg, ima razloga za zadovoljstvo jer će se vratiti u Top 30, tačnije biće 26. na VTA listi.