Street Food Festival u Širokom Brijegu (21 - 23. jul) otvoriće muzički nastup crnogorskog rep dvojca Who See. Dejan Dedović Dedduh i Mario Đorđević Noyz vraćaju se na "mjesto zločina" iz 2019. kada su, doslovno na istom mjestu samo na pozornici WHFesta, repovali s fanovima po velikom pljusku i tako svima napravili veče za pamćenje.

"Tad je to bio naš prvi koncert u Širokom Brijegu i ta fotografija, s kišom i ljudima u publici koji plešu, stoji nam na istaknutim mjestima po društvenim mrežama. Fanovi mogu očekivati dobar rep, tehnički i energetski na nivou, kao što to naša klapa vazda radi - obećava Dedduh.

Budući da je Street Food Fest prvenstveno festival hrane, iako ni muzički dio nikad ne zaostaje, Dedduh je otkrio u svom stilu da je na takvim festivalima pametnije prvo nastupati pa jesti jer bi moglo doći do pada krvnog pritiska ako bi okrenuli postupke.

Who See je na sceni više od dvije decenije a svaki njihov album iznova oduševi jer se ljudima lako pronaći u svim tim stihovima. Oni na humorističan, često i satiričan način uspijevaju svakodnevne situacije da pretoče u zanimljive, kreativne i pamtljive rime koje su svojstvene upravo našem mentalitetu, a zašto je to tako i nije teško zaključiti.

Iz njihovih pjesama stiče se utisak da oni muziku stvaraju s neizmjernom lakoćom i to je zaista tako jer  kod nema  umjetničke blokade, "stalno se buca pa što ispa‘ne."

- Vidimo se u Širokom Brijegu. Ovoga puta bez kišobrana i kabanica, samo dobro raspoloženje i rep do daske", poručuju organizatori Street Food Festa.