U balonu "Vuk" odigrane su finalne utakmice Minifudbal Studentskog kupa Crne Gore. Šampionski pehar pripao je ekipi Intelektualci koja je u uzbudljivom finalu savladala ekipu Studentski dom NK -DIF rezultatom 6:5.

Ništa nije nagovještavalo da će finale biti uzbudljivo. Ekipa Studentski dom NK - DIF je već u 12. minutu imala čak tri gola prednosti (4:1) ali je borbena ekipa Intelektualci već do poluvremena preokrenula rezultat u svoju korist, prije svega zahvaljujući čvrstoj i igri na ivici faula u odbrani ekipe Studentski dom NK DIF koja je prouzrokovala dva kaznena udarca u korist ekipe Intelektualci.

U drugom poluvremenu ređale su se šanse sa obje strane, postignut je po jedan pogodak, ali favorizovana ekipa iz Nikšića nije uspjela da poravna rezultat pa je titula zasluženo pripala ekipi Intelektualci.

Uzbuđenja nije falilo ni u meču za treće mjesto gdje je ekipa Ekonomskog fakulteta slavila nakon preokreta protiv ekipe DIF 3 rezultatom 7:3.

Finale - Studentski dom NK DIF– Intelektualci 5:6 (Vujačić u 1, Nikčević u 7. i 12, Vukčević u 7, K. Vuković u 30. - Jovanović u 6. i 19, Čolović u 15. i 18, Rakić u 19. i 27.); za treće mjesto: DIF 3 - Ekonomski fakultet 4:7 (Janjušević u 3, Fetić u 10, Agović u 13, Ćeranić u 26. - Stanić u 10, 18, 21. i 37, Pejović u 20, Dervišević u 25, Mijović u 33.).