Pehar na mastersu u Madridu koji su obilježile brojne povrede igrača i predaje pripao je osmom teniseru svijeta Rusu Andreju Rubljovu, koji je nakon preokreta savladao Kanađanina Feliksa-Ožea Alijasima, 35. igrača na ATP listi sa 4:6, 7:5, 7:5 nakon dva sata i 49 minuta.

Rubljov je prije Madrida bio u krizi, ispadao u uvodnim rundama na mastersima u Indijan Velsu, Majamiju i Monte Karlu i turniru iz serije 500 u Barseloni, ali je u "Magičnoj kutiji" ponovo zaigrao svoj najbolji tenis, pokazao zašto je u Top 10 i domogao se druge masters titule, nakon prošlogodišnjeg slavlja u Kneževini i ukupno 16. titule u karijeri.

Sa druge strane, Ože Alijasim je poražen u prvom masters finalu u karijeri i ostao je na pet osvojenih trofeja, a za utjehu mu ostaje da će se vratiti u Top 20 na ATP listi.