Za razliku od svog kolege Martina Skorsezea, Miler nema loše mišljenje o blokbasterima i superherojskim filmovima, što je prije pet godina otkrio u intervjuu za Dedlajn.

"Gledam sve te filmove", izjavio je Miler 2019. godine.

"Iskreno, što se tiče ove rasprave, kinematografija je kinematografija i to je jako širok pojam. U konačnici, najvažnije je šta to znači publici. Postoji sjajan citat koji se odnosi na sve što radimo. To je citat pripovjedača koji su govorili svahili. Svaki put kada bi završili priču, rekli bi: ‘Priča je ispričana. Ako je loša, to je moja krivica, jer ja sam pripovjedač. Ako je dobra, pripada svima.‘"

Miler je u svom najnovijem filmu, Furiosa: Pobesneli Max Saga, sarađivao sa zvijezdom Thora, Krisom Hemsvortom. Nakon što su ga novinari upitali želi li da sarađuje sa Krisom na Thoru 5, Miler je odgovorio potvrdno.

Marvel Entertainment već godinama radi na petom filmu superherojskog serijala, ali studio još uvijek nije pronašao reditelja.

"Sarađivao bih sa Krisom na bilo čemu. Stvarno bih. On je divan glumac. Posjeduje širok spektar raznih vještina", rekao je reditelj.

"Mislim, morate biti fizički spremni. No, isto tako morate biti emocionalno i intelektualno prilagodljivi kako biste dobro odglumili bilo koju kompleksnu ulogu. Imao sam sreće sa svojom glumačkom postavom".