Ovaj kolač od višanja i griza pravi se brzo i jednostavno. Potrebno je koristiti samo sastojke koje uglavnom svi imaju u kuhinji. Kolač će biti mekan, sočan i vazdušast, i njegov ukus vratiće vas u djetinjstvo.

Za pripremu možete koristiti svježe višnje, a podjednako će biti ukusan i sa smrznutim višnjama ili onima iz kompota, ali je bitno da se dobro ocijede.

Sastojci:

5 jaja

120 grama šećera

200 ml jogurta

100 ml ulja

200 grama brašna

150 grama griza

pola kesice praška za pecivo

500 grama opranih i očišćenih višanja

po želji: šećer u prahu za posipanje

Priprema:

U prvoj posudi umutite mikserom bjelanca (od 5 jaja) u šlag, i odložite sa strane, a u drugoj činiji sipajte šećer i dodajte žumanca (od 5 jaja), i mutite dok ne dobijete pjenu. U dobijenu žutu smjesu dodajte ulje i jogurt, pa sjedinite sastojke. 

Pomiješajte brašno s praškom za pecivo i grizom, pa ga dodajte dobijenoj žutoj smjesi, i dobro umutite mikserom. Potom smjesi dodajte šlag od bjelanaca, i promiješajte ručno žicom za mućenje dok ne dobijete lijepu kremastu, tečnu strukturu.

Tepsiju nauljite i pospite brašnom, pa ulijte smjesu koju ćete izravnati, i po kojoj ćete posuti višnje. Kolač pecite na 180 stepeni u prethodno zagrijanoj rerni, oko 40 minuta. Kad se ohladi, kolač možete posuti šećerom u prahu.